A primavera chega ás Fragas do Eume

A primavera tamén chegou ás Fragas do Eume e a vexetación amósase aos ollos do visitante en todo o seu esplendor. Este bosque atlántico costeiro discurre ás beiras do río Eume e constitúe un ecosistema único en Europa.

Aínda que o carballo é a árbore con maior presenza, o visitante poderá gozar da frondosa sombra de castiñeiros, bidueiros, bieiteiros, ameneiros, salgueiros, abelairas, freixos, pradairos, acivros, érbedos, loureiros, teixos e moitas outras especies galegas, algunhas delas en perigo de extinciòn. A espesura das súas pólas dificultan o paso da luz e do vento, mantendo unha humidade e temperatura case constante no chan, que crean unhas condicións idóneas para a existencia de pequenos invertebrados e unha grandísima variedade de fentos de gran valor ecolóxico.

Podemos realizar distintas rutas de sendeirismo. En cada unha delas a paisaxe é un galano para os ollos e para o espíritu.  Nos arredores tamén poderemos observar a pegada que os distintos asentamentos humanos deixaron ao longo da historia. Boa mostra deles son os mosteiros de Caaveiro e Monfero, a torre dos Andrade ou un bo número de castros, localizados todos eles nun radio reducido.