Rosalía de Castro (Santiago de Compostela-1837, Padrón-1885), muller adiantada ao tempo que lle tocou vivir, é a figura máis representativa das nosas letras. Coa publicación da súa obra Cantares Gallegos, o 17 de maio de 1863, comeza o período do Rexurdimento da literatura galega contemporánea, momento no que a reivindicación da lingua como vehículo de comunicación literaria camiña parello ao agromar do sentimento nacionalista.
De 1880 data Follas Novas, obra na que o lirismo intimista acada a máis alta realización artística, nunha angustiada pregunta sobre o sentido da existencia humana, a dor e a inxustiza social.
É ademais autora dun Conto galego e de distintos poemarios e novelas escritas en castelán.
